मौनताको गर्जन !

ढ्याङ्ग्रो बजिरहेछ, गहिरो मनभित्र, माथि म समुन्द्रजस्तै शान्त छु, वा शान्त देखिने अभ्यास गर्दैछु । गर्भभित्रको ज्वालामुखी, फुट्ला जस्तो गरी उम्लिँदै आउँछ, म यसलाई सम्हाल्न सक्छु ? कि आफैं पोखिएर बग्छु थाहा छैन । यो उथलपुथलमा पनि, म किन निस्तब्ध छु ? यो भित्रको कोलाहलमा, किन म चुपचाप अडिरहेछु ? म के गरिरहेछु ? के गर्नु पर्छ ? कता जाँदैछु ? कता जानु पर्छ ? यी प्रश्न म बाहिर सोध्न सक्दिन, भित्रको म ले जान्दैन । सायद मभित्र, म को रूप लिँदैछ, अघिल्लो स्वरूपको अस्तित्व, अब चर्किँदै छ । (म) भन्ने कुरा म होइन रहेछु, यही बोध जन्मिँदैछ । मैले हेर्नसिक्नुपर्छ, कसरी (म) बन्ने रहेछु, र कसरी म विगतमा बनेको थिएँ । कसरी म पुनः जोडिने रहेछु, जसरी म अतीतसँग गाँसिएको थिएँ । म आफ्नो साक्षी बस्ने अभ्यास गर्दैछु, त्यसैले म निस्तब्ध छु । 🕉️🙏